Laz Kültür Derneği

Lazi Xaçkaşi Okhopinalek, Mpholis na skiduran Lazepe kokhokhorobu. Mpholuri gamamtumes (Boğazis) na-eyotzes Portaxe coxoni resthurantis na-dodgu gyaris obiru do oxoronu va dodgitu. Obiru (othrağodu) şeni na-moxthes gurubepek Lazuri, Turkuri, Mergeluri, Korturi do Msumexuri (Xemşiluri) birabape thkhves.
Esat Sarik, xoroni şeni  ‘Ham oxoronu var ren, oxvaminu ren, oxoronuşe var, oxvaminuşe giyoxamt, ya tku şkhule mteli xoronişe keyiselu do ar çkva va doxedu.
Marthi doloxe na-didgu Lazi Kyulturişi
Okhopinale, Lazuri do xaçkhaşi skhidala şeni na-ikums dulyapes ar-ti gyari keluyeşu. Baltalimanis na-ren Portaxe Restaurantis na okhikhorobes Lazepek, Lazuri ixaphares, guda (thulumi) do çemanete ixorones, gamiyoxes. Seris na-ibiru sanatçhipeşe Bayar Şahin, Vova, Engin Alptekin, Erdal Bayrakoğlu, Oktay Üst, Cihangir Bilgin, Grup Helesa, Grup Nena do Grup Teonak “Lazuri nena do xaçhkha mogondunas, phanda skhudas” ya thkhves do vorsi gurite gyoxvames. 

Kolxetişi mjora nena-çkunis eyotanasere
Seris ipti Okhopinaleşi nodude Memedali Bariş Beşlik isinapu. Beşlik, “Okholva-şkhuni gyari oşkhomu şeni xvala var, nena do xaçkha-şkhuni voçuletinat deyi on ya thkhu do ‘Lazuri ğurun, xaçhkha-şkhuni ğurun. Oxoris Lazuri va visinapamt, berepe-şkhala va vixaphat. E hindos phaphuphe-şkhunişi nena muçhe diguranene? Ham derneği heşeni dobdgit. Vorsi dulyape phatere. Ham okholva heşen-on. Xoroni, desthani, othrağodu şeni. Lazepe mi oran, ognan. Mutişe şkhurina va miğuran’ ya thkhu. Lazuri nena do xaçhkha şeni a mutxape oxinapu, 1992’is Laz Kültür Vakfi coxoni ar organizasioni dodgalu do cencepeşi oxoronute coçhu-donu ya thkhu. Beşlik, ‘Ukhaye OGNİ kogamaxthu. Ancakçi aşi fori na gamamağes svara-şkhuni galendonepek var, khoçi do cençhareri na va miğuthey şeni cinkholu. OGNİ-te hindos na vikumthit hus na vikumtpe orthu. Vitho xut tzanaşe huşa ayiri ayiri na vikumthit dulyape aşkhva derneği otva tude phatere. Cumapoba irden, nena-şkhuni dimencelen! Huy do mele daha khevi dobgutatere.’ ya thkhu.     
Beşli şukhale na isinapu Esat Sarik-ti, ‘Andğa hak cari oşkhomu şeni var, derneği-şkhuni vomordinat deyi okhovikhorobit.  Derneği mecburi dobdgit. Ptsadit-çi Lazi na va oranpek Lazepe şeni oxapharu kocoçhes. Hindos ham haşo va iyas ya do xepepe govinzhikhit. Lazuri nena do xaçka-şkhuni şeni a mutxa ozithu diçhirasis şkhu ptkvatere aşkhva. Ham cari, derneği-şkhunis ğureri muşi dvaxvas ya do phit. Derneği-şkhunis uci mepçat-çi nena-şkhuni do xaçhkha-şkhuni skhudas. Derneğis muya na iyen irik moxthan do tsadan. A svacişe Lazuri svara gamaviğatere. Moxtit do gaxeneranşi memakhatith” ya thkhu.

Guri-çkuni tkvani khala ren
Oxapharupe diçodu şukhale othrağodupe kocoçhu. Seri gverdişa Lazuri, Mergeluri, Turkuri do Korturi na ibires gurubepek “Lazuri nena phanda skhudas” ya do gemoxvames do ‘Cumalepe do dalepe, çkar mot şkhurdut, na gedgitit gzas şkhu-ti khaphula thkvanis voret ya thkhves. Bayar Şahinik xolo, ‘Turkiye şkhimişi zenginobas na ekhvanthalit şeni opşa vixelam. Dunyas na moykhvaten sum şilya nena ren. Ham dunyas na isinapinen aşi şilya nenaşi gverdi ren. Lazuri hini doloxe var orthas. Çkar mo şkhurdut, muşeni-ki aşkhva na okhipinatere a sva kogiğuran.’ ya thkhu.
1992’işe ham tere Lazuri nena do xaçhkha şeni seri ndğaleri na patsxalams do putsxums, çitabepe na nçharums İsmail Bucakhlişik Xelimişi Xasanişe Lazuri şiirepe mizithes. Him do made ham ndğalepeşe molva-şkhunis xepe na uğuran ğureri Lazepeşe, iphthi Kazim Koyunci, himu şukhale İmdat Oğuzi, Nurdoğan Demir Abaşişi, Yüksel Yilmazi, Fahri Kahramani do Recai Ozguni va elişinuşa va vu.
Do, Lazepek seri oxoronute keyontxozes.
 

Mu tkves?
Lazuri Xaçkaşi Okhopinalek na-dodgu seris na thrağodes Sumexi do Kortu khomşipe şkhunik nena do xaçhkhape skhudan ya tkves.

Bayar Şahin (Kortu mabire)
Lazuri va ğuras. Muşeni-ki Lazuri Kyulturişi Okhopinale koren aşkhva. Şkhu, Kaçkharepeşi tis na-gontzams purkepe stheri mskhva do okhoberi pskhudatere.

Hikmet Akçiçek (Msumexuri mabire)
Lazuri Kyulturişi Okhopinale, ikumspe şeni vorsi gurite gevoxvamam. İkumt dulya, opşa vorsi ren. Cumalobate pskhudat.

Erdal Bayrakoğlu (Lazi mabire)
Okhopinale-şkhuni soğuni kodidgu. Opşa vixelam. Lazonas aroğorda na-pskhudut Msumexi, Kortu do mteli Zuğanurepe-şkhala ar svas gebdgitur do phthrağodum şeni-ti opşa xeleri vore.
Ntsaşa exthit.